അൽ ഹസ: നവ കേരള സദസ്സെന്ന ഓമനപ്പേരിട്ട് മുഖ്യമന്ത്രിയും പരിവാരങ്ങളും 34 ദിവസമായി കേരളത്തിൻ്റെ തെരുവീഥികളിലൂടെ നരനായാട്ട് നടത്തിയ യാത്ര നവ കേരള സദസ്സല്ല, മറിച്ച് നവ കേരള ഗുണ്ടാ യാത്രയായിരുന്നുവെന്ന് ഒ ഐ സി സി സൗദി അൽ ഹസ്സ ഏരിയ കമ്മറ്റി പ്രസിഡൻ്റ് ഫൈസൽ വാച്ചാക്കൽ, ജനറൽ സെക്രട്ടറി ഉമർ കോട്ടയിൽ എന്നിവർ സംയുക്ത പ്രസ്ഥാവനയിൽ പറഞ്ഞു.ജനസമ്പർക്കമാണുദ്ദേശമെങ്കിൽ മുൻ മുഖ്യമന്തി ഉമ്മൻ ചാണ്ടി ചെയ്തത് പോലെ ജനങ്ങളിലേക്കിറങ്ങിച്ചെന്ന് അവരുടെ പരാതികളും വേവലാതികളും സഹിഷ്ണുതയോടെ കേട്ട് പ്രശ്നങ്ങൾക്ക് പരിഹാരം കാണണമായിരുന്നു.ഉമ്മൻ ചാണ്ടി നടത്തിയത് പോലുള്ള ജനസമ്പർക്ക പരിപാടികൾ നടത്താൻ പിണറായിയും പരിവാരങ്ങളും ഒരു ജന്മം കൂടി ജനിക്കേണ്ടി വരും. ഒരു മാസത്തിലധികമായി തിരുവനന്തപുരത്തെ ഭരണ സിരാ കേന്ദ്രമായ സെക്രട്ടറിയേറ്റിനെ നാഥനില്ലാകളരിയാക്കി, എന്നാൽ നയപരമായോ, മനുഷ്യത്വപരമായോ ഒരു തീരുമാനവുമെടുക്കാനാവാതെയാണ് കാസർഗോഡ് കല്യാശ്ശേരിയിൽ നിന്നും തുടങ്ങി സർക്കാർ സ്പോൺസേർഡ് ആഡംബര വിനോദ ധൂർത്ത് യാത്ര തിരുവനന്തപുരത്തെത്തിയിരിക്കുന്നത്. ക്ഷേമപെൻഷനുകൾ മാസങ്ങളോളമായി മുടങ്ങി കിടക്കുന്നതും, നിത്യോപയോഗ സാധനങ്ങളുടെ അനിയന്ത്രിതമായ വിലക്കയറ്റവും, സ്ത്രീകൾക്കും കുട്ടികൾക്കും പുറത്തിറങ്ങി നടക്കാനാവാത്ത വിധം ക്രമസമാധാനാന്തരീക്ഷം താറുമാറായി കിടക്കുന്നതുമെല്ലാം ചൂണ്ടിക്കാട്ടി പ്രതിപക്ഷ യുവജന സംഘടനകൾ വിശിഷ്യാ യൂത്ത് കോൺഗ്രസ് പ്രവർത്തകർ തികച്ചും ജനാധിപത്യപരമായ രീതിയിൽ കരിങ്കൊടി കാണിച്ച് തങ്ങളുടെ പ്രതിഷേധം അറിയിക്കുമ്പോൾ അസഹിഷ്ണുതയോടെ പാർട്ടി പ്രവർത്തകരെയും സ്വന്തം അംഗരക്ഷകരടക്കമുള്ള സർക്കാർ ഉദ്യോഗസ്ഥരെയും ദുരുപയോഗപ്പെടുത്തി ക്രൂരമായി മർദ്ദിച്ച് നടത്തിയ യാത്ര നവകേരള ഗുണ്ടാ യാത്ര തന്നെയാണ്. യൂത്ത് കോൺഗ്രസ് പ്രവർത്തകരുടെ തല തല്ലി പൊട്ടിച്ചും, സ്ത്രീകളെപ്പോലും മർദ്ദിച്ചവശരാക്കിയും, അവരെ പുരുഷ പോലീസുകാർ ഷർട്ടുകൾ വലിച്ചു കീറിയും ഈ ഗുണ്ടാ ഭരണം അധികകാലം മുന്നോട്ട് കൊണ്ട് പോവാമെന്നു് കരുതേണ്ടന്ന് ഫൈസൽ വാച്ചാക്കലും ഉമർ കോട്ടയിലും പ്രസ്ഥാവനയിൽ ചൂണ്ടിക്കാട്ടി. മുഖ്യമന്ത്രിയുടെ അറിവോടെയോ മൗനസമ്മതത്തോടെയോ നടത്തിയ ആ നരനായാട്ടുകളിൽ അൽ ഹസ്സ ഒ ഐ സി സി ശക്തമായി പ്രതിഷേധിക്കുകയും അപലപിക്കുകയും ചെയ്യുന്നതോടൊപ്പം, അനീതിക്കും അക്രമങ്ങൾക്കുമെതിരെ നടക്കുന്ന പോരാട്ടസമരങ്ങളിൽ മുന്നണി പോരാളികളായ യുത്ത് കോൺഗ്രസ്, കെ എസ് യു മഹിളാ കോൺഗ്രസ് പ്രവർത്തകർക്കും,നേതാക്കൾക്കും അൽ ഹസ്സ ഒ ഐ സി സി ഐക്യദാർഢ്യം പ്രഖ്യാപിക്കുന്നു.