കൊച്ചി: കോതമംഗലത്ത് വയോധിക കാട്ടാനയുടെ ആക്രമണത്തിൽ മരിച്ച സംഭവത്തിൽ സർക്കാരിന്റെയും വനം വകുപ്പിന്റെയും ഗുരുതര വീഴ്ചയ്ക്കെതിരെ കോൺഗ്രസിന്റെ നേതൃത്വത്തിൽ ആരംഭിച്ച ഉപവാസ പന്തലിൽ പോലീസ് നടത്തിയ അഴിഞ്ഞാട്ടത്തിൽ സംസ്ഥാനത്തിന്റെ വിവിധ ഭാഗങ്ങളിൽ പ്രതിഷേധം. കോതമംഗലത്ത് കോൺഗ്രസിന്റെയും വിവിധ പോഷക സംഘടനകളുടെയും നേതൃത്വത്തിൽ പ്രതിഷേധം അരങ്ങേറുന്നു. ഇടുക്കി എംപി ഡീൻ കുര്യാക്കോസും മുൻ പ്രതിപക്ഷ നേതാവ് രമേശ് ചെന്നിത്തലയും ഇപ്പോഴും ഉപവാസ പന്തലിൽ തന്നെ തുടരുകയാണ്. എംഎൽഎമാരായ അൻവർ സാദത്തും റോജി എം ജോണും പൊലീസ് സ്റ്റേഷനിൽ തുടരുന്നു. തിരുവനന്തപുരത്ത് പ്രതിപക്ഷ നേതാവ് വി ഡി സതീശൻ ഉൾപ്പെടെ സമര രംഗത്തുണ്ട്. എറണാകുളത്ത് കോൺഗ്രസ് പ്രവർത്തകർ റോഡ് ഉപരോധിക്കുന്നു.