സ്വന്തമെന്ന് വിളിക്കാൻ‌ കഴിയുന്ന ഒരിടമാണ് വീട്. എവിടെപ്പോയാലും മനസ്സുകൊണ്ട് തിരികെ വന്നു ചേരാൻ ആഗ്രഹിക്കുന്ന ഇടം. വീടെത്ര മനോഹരമാണോ അത്രത്തോളം സന്തോഷവും നമ്മുടെ ജീവിതത്തിന് ഉണ്ടാകും എന്നാണ് പറയുന്നത്. അല്ലെങ്കിൽ തന്നെ മറ്റൊരാൾ നമ്മുടെ വീട് കണ്ടിട്ട് അത് കാണാനെത്ര മനോഹരമായിരിക്കുന്നു എന്ന് പറയുമ്പോൾ കിട്ടുന്ന സന്തോഷം എത്ര വലുതാണ്. അതുകൊണ്ടു തന്നെയല്ലേ വീട് പഴയതോ പുതിയതോ ആയിക്കൊള്ളട്ടെ, എല്ലാവരും എപ്പോഴുമത് ഭംഗിയുള്ളതാക്കി കാത്തുസൂക്ഷിക്കാൻ ഇഷ്ടപ്പെടുന്നത്. വീടിൻ്റെ ഭംഗിയെ കുറിച്ച് പറയുമ്പോൾ അകവും പുറവും ഒരുപോലെ പ്രധാനപ്പെട്ടതാണ്. പുറമേ ആണെങ്കിൽ നല്ല നിറങ്ങളിൽ പെയിൻറ് ചെയ്തും മുറ്റത്ത് ആകർഷകമായ പൂക്കളാൽ നിറഞ്ഞു നിൽക്കുന്ന പൂന്തോട്ടവുമൊക്കെ വെച്ചുപിടിപ്പിച്ചും നമ്മളിത് ഏറ്റവും മികച്ചതായി മാറ്റിയെടുക്കും. എന്നാൽ വീടിനുള്ളിലെ ഇൻറീരിയർ ആശയങ്ങളുടെ കാര്യത്തിൽ പുതുമകൾ എന്തൊക്കെ കൊണ്ടുവരണമെന്ന് നോക്കാം.