യുബറിൽ അധിക നിരക്ക് ഈടാക്കുന്നു : കയ്യോടെ പിടികൂടി,കേന്ദ്ര മന്ത്രി പ്രഹ്ലാദ് ജോഷി

23-05-2025

വേഗത്തിലുള്ള സേവനത്തിനായി മുൻകൂർ ടിപ്പുകൾ നൽകാൻ ഉപയോക്താക്കളെ പ്രേരിപ്പിച്ചതിന് ഇന്ത്യാ ഗവൺമെന്റിന്റെ സെൻട്രൽ കൺസ്യൂമർ പ്രൊട്ടക്ഷൻ അതോറിറ്റി (സിസിപിഎ) ക്യാബ് അഗ്രഗേറ്റർ കമ്പനിയായ ഉബറിന് നോട്ടീസ് നൽകി. കമ്പനിയുടെ 'അഡ്വാൻസ്‍ഡ് ടിപ്പ്' സിസ്റ്റം കാരണമാണ് ഈ നോട്ടീസ് അയച്ചിരിക്കുന്നത്. എത്രയും വേഗം റൈഡ് കൺഫർമേഷനും പിക്കപ്പും ലഭിക്കുന്നതിന് ഉപയോക്താക്കളെ അധിക തുക നൽകാൻ നിർബന്ധിക്കുന്നതിനാണ് കമ്പനി ഈ ടിപ്പ് സിസ്റ്റം ഉപയോഗിക്കുന്നത്. കേന്ദ്ര ഉപഭോക്തൃകാര്യ മന്ത്രി പ്രഹ്ലാദ് ജോഷി ഇത്തരം സംവിധാനങ്ങളിലും രീതികളിലും ഗുരുതരമായ ആശങ്ക പ്രകടിപ്പിക്കുകയും അവയെ അധാർമ്മികം എന്നും ചൂഷണം എന്നും അന്യായമായ വ്യാപാരത്തിന്റെ ഒരു രൂപം എന്നും വിശേഷിപ്പിച്ചു. സേവനം നൽകിയതിനുശേഷം സ്വമേധയാ നൽകുന്ന അഭിനന്ദന പ്രകടനമായിരിക്കണം ടിപ്പ് നൽകുന്നതെന്നും മുൻകൂട്ടി ആവശ്യപ്പെടുന്ന ഒരു അവകാശമല്ലെന്നും കേന്ദ്രമന്ത്രി വ്യക്തമാക്കി.